Mittwoch 18 Uhr Küeraobend im Heimathaus

Ik maak nu Hoombänking un dat klapt auk ganz guëd. Män veliëddene Wiärke was dat anners. Nix gönk mäer. Ik kreeg de Mellung „Ihr Abort, tschuldigung, Accound ist geperrt. Setzen sie sich mit Ihrer Bank in Verbindung“. Dat häb ik dan daon un dao häbt se mi sägt dat ik drai maol ne vekääde TAN ingieben harre. Se wollen mi met de Post nen Koot, tschuldigung Code, toschikken dat ik dat Wiärks wier frieschalten kon. Aower ik mos auk noch ne Äpp up mien Smaatfoon upspiëlen denn ohne de Äpp gönk dat nu nich mäer. Dat was ne dubbelte Sicherung, daorüm dat nich annerwächtens eener in miene Bänkingsoftwär drin kuëmen konn. Un dat is dat wat ik nich begriep. Dao mot man nu an`n WC, tschuldigung, PC, toiärst ne PIN un `n Paswaord ingiëwen un dann up dat Smaatfoon de Äpp uproopen. Dao stait dan ne TAN in un de mot dan an`n PC ingiëwen wäern. Mannoman, ümständlikker gait et ja wol nich. Dat is ja jüst so äs wenn man sik, daorüm dat se eenen dat Pottemanee nich klaut, äs dubbelte Sicherung ächten an de Buxe de Gattaske tonait. Wenn man dan int Geschäft wat betaalen mot, dan trekt man de Buxe uut un trennt de Naot wier laos, un wenn man betaalt häw döt man dat Pottemanee wier in de Gattaske un nait, äer dat man de Buxe wier antrekt de Gattaske wier to. So, aower nu dat Wichtigsde. Et is düsse Wiärke de diärde Gunsdag in`n Monat un wi driärpt us Aobends, klok ses, wier unnern Boosen to`t Waterdüörsken. Aower nait ju de Gattasken nich to. Süs duert dat met de Betaalerie so lange un wi kuëmt nich rechttietig wier nao Huus hen. Guëd gaon.