Küeraobend im Heimathaus

Laott Water uutn Buuk un den Buuk uutt Water. Dat was eent von de Sprüekskes de mi mien Besvader maol vetellt häw. Un wao he recht häw, dao häw he recht. Water tot Wasken to niëmen, dat mag ja noch angaon. Aower Water drinken? Bä! Dao mäks di ja den ganzen Duorst met kaput. So häb ik bes nuhen auk dacht. Män bi düsse Wiärmde de wi nu Buuten häbt, dao sin ik, ji küent et glaiwen of auk nich, to Vestand kuëmen Mien Besvader harre doch nich recht. Wat giw et nu wol schöneret äs bi düsse Hitze n Glas iiskaold Water to drinken. Un wat döt eenen nu wol biäter gued äs dat man metn üörndlikken Plumps in n Waaterpool springt. Dat köölt eenen üörntlik af. Dao faölt mi jüst wat in. Int Heimathuus is et auk nicht to warm. Dao kann man et wol uuthaollen wenn wi us Gunsdag Aobend, klok Sess, tot Waterdüöersken driäpt. Wat Kaolet to drinken, un nich blos Water, häb wi dao auk. Also, nich lange links, Gat in de Haöchde un rüöwer kuëmen. Wi häbt de lesden Maole ne Masse Plasseer hat un dat sal dütmaol auk wol so sien.

Schreibe einen Kommentar

Deine E-Mail-Adresse wird nicht veröffentlicht.